Fabrice Muamba aonyesha dalili za kuimarika

Fabrice Muamba aonyesha dalili za kuimarika

Klabu ya Bolton Wanderers imesema kiungo wake anayeugua Fabrice Muamba sasa anaweza kupumua mwenyewe lakini angali katika hali mbaya. Muamba yuko katika hospitali ya London Chest nchini Uingereza.

Katika taarifa ya pili kutoka kwa klabu hiyo ya ligi kuu ya soka Uingereza, ni kuwa Muamba anaendelea kuonyesha dalili za kuimarika, siku mbili tu baada ya kupatwa na mshtuko wa moyo wakati wa mchuano wao wa kombe la FA. Taarofa hiyo ilisema sasa anaweza kupumua kwa kujitegemea bila usaidizi wa mitambo. Pia anaweza kuwatambua watu wa familia yake na kuyajibu maswali ipasavyo.

Fabrice Muamba alipatwa na mshtuko wa moyo wakati wa mechi ya Tottenham na Bolton

Wakati huo huo mtaalamu mmoja wa upasuaji wa moyo amesema atawafanyia vipimo wachezaji wa klabu ya Tottenham Hotspurs ili kuona kama kuna uwezekano wa matatizo yoyote ya moyo, kutokana na ombi la wachezaji waliomuona kiungo wa Bolton Fabrice Muamba akipatwa na mushtuko wa moyo na kuzirai uwanjani. Daktari wa moyo Sanjay Sharma amesema matukio ya mushtuko wa moyo miongoni mwa vijana ni nadra sana, na humwathiri mmoja kati ya watu 50,000. Maradhi mengi ya moyo ni ya urithi kutoka kwa kizazi kimoja hadi kingine.
Huku hayo yakijiri, mchuano wa ligi ya Uingereza kati ya Bolton Wanderers nyumbani kwa Aston Villa uliotarajiwa kuchezwa kesho umeahirishwa kutokana na hali ya Muamba. Maafisa wa ligi wamesema mchuano huo umeahirishwa kutokana na ombi la klabu ya Bolton. Wachezaji wa Bolton hawako tayari kucheza mchuano huo na hivyo utapangwa tena baadaye. Mchuano utakaofuata utakuwa dhidi ya Blackburn Rovers siku ya Jumamosi.
Dortmund na Bayern wapepea
Katika ligi ya soka Ujerumani – Bundesliga, mabingwa Borussia Dortmund waliendelea kuongoza kwa tofauti ya pointi tano baada ya ushindi wao wa goli moja bila jawabu mwishoni mwa wiki dhidi ya Werder Bremen.

Dortmund wanaendelea kushika usukani wa Bundesliga

Bayern Munich waliwazaba Hertha Berlin magoli sita kwa sifuri na kusalia katika nafasi ya pili na pointi 54. Nambari tatu Borussia Moenchengladbach iliyo na pointi 52 inaendelea kutafuta tiketi ya kushiriki ligi ya mabingwa msimu ujao, baada ya kuwafunga Bayer Leverkusen magoli mawili kwa moja. Schalke pia wanaendelea kudhihirisha umahiri wao baada ya kuwaduwaza Kaiserslautern mabao manne kwa moja jana Jumapili.
Wakati huo huo Bayern Munich na Borussia Dortmund wataendeleza vita vya ubabe wao katika soka ya nyumbani kuwania kombe la shirikisho la Ujerumani, DFB Pokal wakilenga kukutana katika fainali. Mabingwa wa ligi na ambao ni viongozi Dortmund watasafiri kuchuana na klabu ya daraja la pili Greuther Fuerth katika nusu fainali ya kwanza kesho Jumanne. Kisha Jumatano mabingwa watetezi wa taji hilo Bayern Munich watakuwa nyumbani kwa mahasimu wao wa Bundesliga Borussia Moenchengladbach katika nusu fainali ya pili. Fainali itakuwa Mei 7 katika uwanja wa Olimpiki jijini Berlin.
Saudi Arabia kuwatuma wanawake katika Olimpiki

Nembo ya michezo ya Olimpiki jijini London 2012

Saudi Arabia inatarajiwa kuwatuma wanariadha wanawake katika mashindano ya Olimpiki kwa mara ya kwanza mwaka huu. Saudi Arabia, Brunei na Qatar hawajawahi kuwajumuisha wanariadha wa kike katika timu zao na Kamati ya Kimataifa ya Olimpiki IOC, ina hamu ya kuona hali hiyo ikibadilika jijini London mwezi Julai.
IOC imesema leo kuwa maafisa wa Kamati ya Olimpiki ya Saudi Arabia wamewasilisha orodha ya wanariadha wa kike wanaoweza kushiriki mashindano hayo ya Olimpiki jijini London.
Shirika la haki za binaadamu la Humans Rights Watch liliwashutumu waandalizi wa michezo ya Olimpiki kwa kile lilichokitaja kuwa ni ubaguzi wa kijinsia kutoka mataifa ya Ghuba ya Kiarabu ya Saudi Arabia na Qatar, pamoja na nchi ndogo ya Kusini Mashariki mwa Asia Brunei. Qatar inayowania fursa ya kuandaa mashindano ya Olimpiki mwaka 2020, ilisema itawatuma wanariadha wanawake katika mashindano ya Olimpiki London kwa mara ya kwanza.

 

Bayern mguu mmoja katika nusu fainali ya Ligi ya Mabingwa

Miamba ya Bundesliga Bayern Munich waliiweka hai ndoto ya kucheza fainali ya ligi ya Mabingwa katika mji wao wa nyumbani. Hii ni baada ya kushinda mchuano wa mkondo wa kwanza wa robo fainali dhidi ya Olympique Marseille

Magoli katika kila kipindi kutoka kwa Mario Gomez na Arjen Robben yaliipa Bayern Munich ushindi wa mabao mawili kwa sifuri nyumbani kwa Olympique Marseille Jana Jumatano. Ushindi huo umewaweka miamba hao wa ligi ya soka Ujerumani – Bundesliga hatua moja karibu na nusu fainali ya kombe la Mabingwa barani Ulaya maarufu kama UEFA Champions League.
Wakati huo huo, mabingwa wa ulaya Barcelona walitoka sare ya bila kufungana na viongozi wa ligi ya soka Italia Serie A AC Milan uwanjani San Siro na kuwacha nafasi ya robo fainali kusalia wazi.
Ushindi wa Bayern unawafanya kuwa timu bora inayopigiwa upatu kufuzu kwa nusu fainali dhidi ya Real Madrid ambao siku ya Jumanne walishinda magoli matatu wka sifuri nyumbani kwa APOEL Nicosia katika mechi y amkondo wa kwanza.
Bayern iliumiliki mpira

Bayern wana matumaini ya kucheza fainali katika uwanja wao wa nyumbani Allianz Arena

Mshambuliaji wa Bayern Mario Gomez alifunga bao lake la 11 la ligi ya Mabingwa msimu huu ikiwa imesalia dakika moja kipindi cha kwanza kukamilika katika uga wa Stade Veledrome, alipoichukua pasi kutoka wka mwenzake Arjen Robben na kusukuma kombora ambalo kipa wa Marseille Elinton Andrade alilikubalia kutikisa wavu, baada ya kushindwa kulidhibiti vyema. Gomez karibu afunge la pili kwa kusukuma mkwaji karibu na lango katika dakika ya 59 lakini Andrade akaupangua, huku naye kipa wa Bayern Manuel Neuer upande ule mwingine wa uwanja akiokoa mkwaju wake mshambuliaji wa Marseille Loic Remy.
Lakini Bayern walijipa bao la pili la afueni wakati Robben alipocheza gonga nipe gonga nikupe na mwenzake Thomas Mueller kabla ya kuweka wavuni bao safi lililombwaga kipa Andrade. Kisha vijana hao wa kocha Jupp Heynckes wakachukua udhibiti kuanzia hapo hadi mwisho.
Schweinsteiger kukosa mchuano wa marudiano
Akizungumza baada ya mchuano kocha Heynckes alisema kitu cha pekee ambacho hakikuwa kizuri kwao ni kwamba walipata kadi za njano. Moja ilimwendea mchezaji wa akiba Bastian Schweinsteiger ambaye sasa hatacheza katika mchuano wa marudiano. Naye Robben alisema wangali na mchuano mmoja wa kucheza nyumbani Allianz Arena. Aliongeza kuwa mchezo wao ulikuwa mzuri pamoja na matokeo na sasa kuna uwezekano wa wao kukutana na Real Madrid katika nusu fainali.
Mario Gomez sasa anapungukiwa goli moja tu nyuma ya Lionel Messi aliyedhibitiwa vikali na AC Milan katika mchuano mkali ulioishia sare ya bila kufungana mjini Milan uwanjani San Siro, mchuano ambao pande zote mbili zilikuwa na nafasi nzuri za kufunga lakini hazikuzitumia vyema.
Barcelona watokwa jasho Milan

Lionel Messi alijaribu kuisumbua ngome ya Milan bila mafanikio

Zlatan Ibrahimovich alikuwa na nafasi ya wazi kwa upande wa AC Milan baada ya dakika 20 wakati alipoipata pasi yake Clerence Seedorf lakini mkwaju wake hafifu mshambuliaji huyo ukaokolewa langoni na kipa wa Barcelona Victor Valdes.
Barcelona waliumiliki mpira kw akiwango kikubwa lakini walikuwa na matatizo ya kufanya mashambulizi yoyote katika lango la adui Milan ambao walikuwa wamejpanga vyema katika safu yake ya ulinzi, hadi dakika za mwisho wakati vijana hao wa kocha Pep Guardiola walipokaribia mara mbili kupata bao.
Carles Puyol alipiga kichwa juu ya lango kutoka mkwaju wa konakatika dakikay a78 nao mkwaju wa Messi ukaokolewa langoni na kipa wa Milan Christian Abiatti, dakika mbili mchuano kukamilika, huku naye Cristian Tello akasukuma shuti lililozuiwa.
Barcelona kuamua Camp Nou
Messi ambaye alikuwa mchezaji wa kwanza kuwahi kufunga magoli matano katika mchuano mmoja wa ligi ya mabingwa, wakati Barca ikiwazaba Bayer Leverkusen 7 – 1 katika awamu iliyopita, angali anahitaji goli la 50 la taaluma yake katika kinyang'anyiro cha Ligi ya Mabingwa. Lakini vijana hao wa Pep Guardiola wana fursa ya kufanya vyema katika mkondo wa pili uwanjani Camp Nou Jumanne ijayo. Mshindi atakutana na Chelsea au Benfica katika nusu fainali, huku klabu hiyo ya Premier League ikiongoza kufuatia ushindi wao wa moja sifuri mjini Lisbon siku ya Jumanne.
Kipa wa Barca Victor Valdes amesema walikuwa na nafasi nyingi lakini hawakuzitumia vyema. Kwamba walijaribu kupokezana pasi fupi wakati wakiumiliki mpira kwa muda mrefu. Anasema mchuano bado ni wazi na sas autaamuliwa uwanjani mwao.