DIWANI AZINDUA MICHEZO YA UMISETA

DIWANI wa kata ya Endiamtu mji mdogo wa Mirerani Wilaya ya Simanjiro Mkoani Manyara,Lucas Zacharia amezindua michezo ya shule za sekondari Umiseta wilayani humo kwa kujitolea seti ya sare za michezo na mipira. 

Akizindua michezo hiyo inayoendelea kwenye viwanja vya Barafu Mirerani na shule ya sekondari Mirerani Benjamin Mkapa,Zacharia alisema michezo ni ajira inajenga mwili na kuongeza marafiki na mwanzo wa mafanikio ni kujituma. 

 Aliwataka wachezaji watakaochaguliwa kuunda timu ya Umiseta ya wilaya hiyo kuiwakilisha Simanjiro kwa nguvu zote kwenye michezo ya Umiseta ya mkoa huo itakayofanyika wiki ijayo wilayani Mbulu.

 “Michezo mashuleni ilifutwa kipindi cha Rais Benjamin Mkapa waziri akiwa Joseph Mungai sasa Rais Jakaya Kikwete amerudisha michezo mashuleni hivyo tumieni fursa hiyo huku mkisoma kwa bidii bila kuchoka,” alisema Zacharia. 

 Ofisa Elimu wa sekondari(Taaluma) wa wilaya hiyo Jilanga Mwantandu alisema timu ya soka ya Kanda B iliifunga Kanda A bao 3-0 yaliyofungwa na Venance Joseph na timu ya Kanda C iliifunga Kanda D bao 3-1.

 Mwantandu alisema kwa upande wa mpira wa pete timu ya Kanda A iliifunga Kanda B bao 22-0 hivyo kuwafuta machozi kaka zao na timu ya Kanda D iliishinda Kanda C bao 12-8. 

Alisema mchujo wa majina ya wachezaji wa timu ya wilaya hiyo itakayowakilisha Simanjiro kwenye michuano ya Umiseta mkoa wa Manyara itakayofanyika wilayani Mbulu wiki ijayo yanatarajiwa kutangazwa kesho.