Kesi ya mauaji ya halaiki dhidi ya Mkuu wa majeshi wa zamani wa Waserbia wa Bosnia, Jenerali Ratko Mladic imeanza leo katika mahakama ya Uhalifu wa Kivita kwa Yugoslavia ya zamani mjini The Hague.

Mladic anashitakiwa kwa kuongoza mauaji ya kikatili ya Waislamu 8,000 wengi wao vijana na watu wazima huko Srebrenica mnamo mwaka wa 1995. Hayo ndiyo mauaji ya kikatili zaidi tangu kumalizika kwa vita vya pili vya dunia.

Ratco Mladic ambaye sasa ana umri wa miaka 70, ndiye mhusika wa mwisho katika vita vya eneo la Balkan katika miaka ya tisini kufunguliwa mashitaka katika mahakama ya Kimataifa ya Uhalifu kwa iliyokuwa Yugoslavia mjini The Hague.

Anatuhumiwa kwa kuchochea siyo tu wiki nzima ya mauaji ya kikatili mjini Srebrenica, bali pia kuzingirwa Sarajevo kwa miezi 43 ambapo zaidi ya watu 10,000 waliuwawa na walenga shabaha, na makombora.