Shahidi: Kifo cha Fundikira kilisababishwa na kuvuja damu kichwani

DAKTARI kutoka Hospitali Taifa Muhimbili ameieleza Mahakama Kuu Dar es Salaam kuwa kifo cha Swetu Fundikira kilisababishwa na damu kuganda kwenye ubongo baada ya kugongwa na kujeruhiwa kichwani. Daktari huyo, Paul Mwalali (48) alieleza hayo jana wakati akitoa ushahidi wake katika kesi ya mauaji ya Fundikira aliyefariki dunia usiku wa kuamkia Januari 24, 2010 inayosikilizwa na Jaji Zainabu Muruke. Ilidaiwa na upande wa mashtaka katika kesi hiyo kuwa Fundikira alifariki dunia baada ya kupigwa na kuumizwa na askari watatu, wawili kati yao wakiwa ni askari wa Jeshi la Kujenga Taifa (JKT) na askari mmoja wa Jeshi la Wananchi (JWTZ). Washtakiwa hao ni MT 1900 Sajenti Roda Robert (42) wa Jeshi la Kujenga Taifa (JKT) Kikosi cha Mbweni, MT 75854 Koplo Ally Ngumbe (37) wa Jeshi la Wananchi (JWTZ) Kikosi cha Kunduchi na MT 85067 Koplo Mohamed Rashid wa JKT Mbweni.  Washtakiwa hao wote kwa pamoja wanadaiwa kutenda kosa hilo la  kumuua Fundikira kwa makusudi Januari 23, mwaka 2010 saa 7:30 usiku Wilaya ya  Kinondoni katika barabara ya Mwijuma. Katika ushahidi wake mahamakani akiongozwa na Wakili wa Serikali   Charles Ishengoma, alidai kuwa katika uchunguzi wake alibaini kuwa kichwa cha marehemu kilikuwa na majeraha na kwamba baada ya kukipasua ndani aliona damu imeganda karibu na fuvu. Hata hivyo shahidi huyo ambaye ni mtaalam wa Kitengo cha Uchunguzi wa Mazingira na Chanzo cha vifo katika Hospitali ya Taifa ya Muhimbili, alidai kuwa fuvu lake lilikuwa salama pamoja na sehemu mbalimbali za mwili. Aliendelea kudai kuwa Januari 26, mwaka 2010 alikabidhiwa taarifa ya Polisi (PF 99) ikimtaka kufanya uchunguzi wa chanzo na mazingira ya kifo cha Swetu Ramadhani Fundikira. “Nilipoanza uchunguzi nilibaini kuwa mwili wa Fundikira ulikuwa na majeraha kichwani.  Niliendelea kufungua kichwa chake karibu na fuvu kulikuwa na damu iliyoganda sehemu iliyo karibu na uti wa mgongo. Nilichunguza fuvu lakini halikuwa na mpasuko wowote,” alidai Dk Mwalali. Dk Mwalali aliongeza kudai kuwa katika uchunguzi wake walibaini kuwa ni kichwani tu ndiko kulikuwa na matizo lakini sehemu nyingine za mwili zilikuwa salama. “Kwa ujumla kifo cha marehemukilisababishwa na kuumia baada ya kichwa kugongeshwa na msukumo mkubwa uliosababisha damu kuchanganyika na ubongo na kuganda,” alisisitiza. Kwa upande wake,  shahidi wa tano, Koplo Eustus katika ushahidi wake alidai kuwa siku ya tukio walimkuta Fundikira akiwa amelala chini akiwa mtupu kama alivyozaliwa, huku akitokwa na damu mdomoni. Koplo Eustus alidai kuwa mshtakiwa wa kwanza na wa tatu walikuwa wamesimama pembeni yake huku wakitoa lugha za matusi na kwamba walipowahoji kuna tatizo gani wakawajibu kuwa ni askari wa Jeshi la Wananchi Tanzania (JWTZ). Aliendelea kudai kuwa alipowauliza kuwa mbona huyo mtu yuko mtupu kama alivyozaliwa kuna tatizo gani, walinijibu kuwa amevua nguo mwenyewe na kwamba ameziacha kwenye gari. “Lakini hali ya yule mtu ilikuwa mbaya sana ikabidi tuwaweke chini ya ulinzi na kuwafikisha katika kituo cha polisi Selander Bridge,” alidai shahidi huyo. Koplo Eustus amba ni askari mpelelezi kutoka Mkoa wa Kipolisi Ilala aliendelea kudai kuwa alipowahoji sana mshtakiwa wa kwanza alijibu kuwa Fundikira alijirusha mwenyewe kutoka kwenye gari yao. Alidai kuwa alishangazwa sana na majibu yao kwa kuwa anavyofahamu askari hawezi kumuweka mtuhumiwa pembeni badala yake ni lazima akae katikati ili kulinda usalama wake. “Washtakiwa walifanya makusudi kumvua nguo na kumdhuru Fundikira,” alisisitiza shahidi huyo. Kesi hiyo itaendelea kusikilizwa leo mahakamani hapo ambapo mashahidi zaidi wa upande wa mashtaka wataendelea kutoa ushahidi wao. Mapema mahakamani hapo jana washtakiwa walisomewa shtaka lao kuwa , Januari 23, 2010 saa 7:30 usiku Kinondoni katika barabara ya Mwijuma, wanadaiwa kumuua Fundikira kwa makusudi.