MTOTO AGONGWA NA BASI NA KUFA

MTOTO Upendo Joseph Amefariki papo hapo baada ya kugongwa na gari akiwa anavuka barabara. Kamanda wa Polisi Mkoa wa Kinondoni, Charles Kenyela alisema tukio hilo lilitokea juzi saa 4:00 usiku katika barabara ya Mama Zacharia eneo la Royal Pub. Alisema mtoto huyo mwenye umri wa chini ya miaka mitano, akiwa na mama yake walitaka kuvuka barabara kwenda upande wa pili, ghafla mtoto huyo aligongwa na gari aina ya Toyota Coaster lenye namba za usajili T665 AVQ. Gari hilo lilikuwa likiendeshwa na Jacob Lwao (28) aliyekuwa akitokea maeneo ya Mama Zacharia kuelekea Peace. Mwili wa marehemu umehifadhiwa katika Hospitali ya Mwananyamala, dereva wa gari hilo amekamatwa na upelelezi unaendelea. Katika tukio lingine, mkazi wa Tandika Mango, Hussein Juma (32) amekutwa akiwa amekufa chumbani kwake baada ya kujinyonga kwa kutumia kamba aliyoitundika juu ya dari. Kamanda wa Polisi wa Mkoa wa Temeke, David Misime alisema tukio hilo ni la juzi saa 11:05 jioni katika eneo la Tandika Mango. Chanzo cha kifo hakijafahamika kutokana na marehemu kutoacha ujumbe wowote. Maiti amehifadhiwa katika Hospitali ya Temeke, upelelezi zaidi unaendelea. Katika tukio lingine, Mlinzi wa kujitegemea aliyetambuliwa kwa jina la Shabani Selemani (39) amekutwa amekufa katika eneo lake analolinda. Selemani ambaye ni mkazi wa Wazo Hill, alikutwa amekufa kwenye shamba analolilinda linalomilikiwa na Cecilia Godwin, huku mwili wake ukiwa hauna jeraha lolote. Chanzo cha kifo chake bado hakijafahamika. Hata hivyo kwa mujibu wa mtoa taarifa Deogratius Ombeni (39), Seleman alikuwa ni mnywaji wa pombe kali kupita kiasi. Maiti amehifadhiwa katika Hospitali ya Mwananyamala.