Tume ya Katiba

Tume ya Mabadiliko ya Katiba inatarajia kuanza kufanya mikutano na wananchi wa mikoa minane kuanzia Julai 2 hadi Julai 30, mwaka huu kwa lengo la 

kukusanya maoni yao kuhusu Katiba Mpya.

Taarifa ya tume hiyo kwa vyombo vya habari jana ilieleza kwamba mikoa hiyo ni Dodoma (Bahi), Kagera (Biharamulo), Kusini Pemba, Kusini Unguja (Kusini), Manyara (Mbulu), Pwani (Mafia), Shinyanga (Kahama) na Tanga (Lishoto). 

“Taratibu zote za kuanza kazi zimekamilika zikiwemo kuandaa ratiba na kuisambaza katika mikoa na wilaya husika. Wajumbe wa Tume na watumishi wa Sekretarieti wamejigawa katika makundi saba. Kila kundi litafanya mikutano katika mkoa mmoja isipokuwa kundi moja litakalofanya mikutano katika mikoa miwili ya Kusini Unguja na Kusini Pemba,” ilisema taarifa hiyo.

Tume imewaomba wananchi kuhudhuria mikutano hiyo na kutoa maoni yao kwa uwazi, uhuru na utulivu.