Mistari mirefu ya wapiga kura Marekani

Vyombo vya habari vimeonyesha mistari mirefu ya wapiga kura katika majimbo mengi ya Marekani ambao wamekwenda vituoni kumchagua rais atakayeiongoza nchi yao kwa miaka minne ijayo. Mistari mirefu imeripotiwa katika mitaa ya miji iliyo katika majimbo muhimu yatakayoamua matokeo ya uchaguzi wa mwaka huu, kama vile Florida na Virginia.

Mjini Washington DC wapiga kura walipiga foleni masaa kadhaa kusubiri zamu yao. Shirika la habari la NBC limeripoti kwamba wapiga kura katika jimbo linalowaniwa vikali la Ohio walisubiri vituoni kwa zaidi ya saa nzima. Wakaazi wa jimbo la New Jersey lililoathiriwa vibaya na kimbunga Sandy wataweza kupiga kura kwa kutumia barua pepe au kwa njia ya fax.

 Katika jimbo jirani la New York ambalo pia lilipigwa na kimbunga hicho, raia wanaruhusiwa kupiga kura katika kituo chochote kile, bila kujali walikojiandikisha. Kura za maoni zimeonyesha wagombea wote wawili, Rais Barack Obama na mpinzani wake wake wa chama cha Republican Mitt Romney wakiwa sambamba, ingawa Obama alipewa nafasi ndogo ya kushinda.