G SAMBWETI

Waziri wa Mambo ya Nje na Ushirikiano wa Kimataifa, Bernard Membe

Kauli ya Waziri wa Mambo ya Nje na Ushirikiano wa Kimataifa, Bernard Membe, kukitabiria ushindi Chama cha Demokrasia na Maendeleo (Chadema), `imemtumbukia’ nyongo.

Mwenyekiti wa Baraza la Wadhamini wa Chama Cha Mapinduzi (CCM), Peter Kisumo, amesema kauli hiyo ni ishara ya woga unaojitokeza mapema, kabla ya mpambano wa kisiasa na kwamba kuingia ama kutoka Ikulu si rahisi.

Kisumo aliyasema hayo jana wakati akiongea na NIPASHE Jumapili, kwa njia ya simu akiwa jijini Dar es Salaam kwenye matibabu, ambapo alisema kauli wa Membe ambaye ni Mbunge wa Mtama, ni woga.

“Siku zote kwenye mapambano huwezi kutupa silaha chini na kisha kukimbia, bali yapaswa kupambana hadi mwisho,” anasema Kisumo mmoja wazee wanaoheshimika ndani ya chama hicho.

Kauli ya Membe aliitoa wakati wa chakula cha mchana, alichowaandaliwa viongozi wa Chadema, waliokuwa katika jimbo la Mtama kwa ajili ya utekelezaji wa Operesheni Okoa Kusini.

“Membe amekuwa mwoga mapema mno, badala ya kupambana anatupa silaha chini na kukimbia, unapotupa silaha chini huwezi kushinda vita iliyopo mbele yako na katika mapambano hayo huwezi kumtabiria adui yako ushindi,” alisema.

Aliongeza, “kazi ya kuingia na kutoka Ikulu si nyepesi, ni kazi ngumu sana kwa Chadema kuingia madarakani”.

Kisumo ambaye pia ni Mjumbe wa Halmashauri Kuu ya Taifa (Nec) ya CCM, alisema ni haki ya Chadema kujiimarisha kwa kuwa CCM imeimarika tangu siku nyingi.

Hivyo, alisema hakuna ubaya kwa wao kuingia hadi ngazi ya kitongoji ambako CCM ina mashina yake, na kwamba hicho si kigezo cha ushindi kwao.

Alisema tatizo kubwa kwenye Chadema kuna wanaharakati na si wanasiasa, na haiwezekani kuongoza serikali kwa kuwa na viongozi wanaharakati.

“Hawa Chadema wanachokifanya ni kuvizia makosa madogo madogo ya serikali na kisha kuwashawishi wananchi wawe upande wao,” alisema.

Aliongeza, “wapo viongozi wa Chadema na waasisi, kama Mzee Edwin Mtei na watu wengine makini ninaowafahamu ndani ya chama hicho, sijawahi kuwasikia wakiropoka hovyo kama wanavyofanya baadhi ya viongozi wa chama hicho.”

Alisema ikiwa hulka hiyo itandelea, kuna hatari ya kukosa sifa ya kushika dola vinginevyo watapata shida, kwani hakuna serikali inayoweza kwenda kwa kuendeshwa na wanaharakati.

Kisumo alisema hakatai uwepo wa upinzani na ukuwaji wake, kwani naye ni mmoja wa walioridhia mfumo wa vyama vingi kuwepo nchini.

Hata hivyo alisema inatakiwa chama ambacho kitashinda kiwe na uwezo wa kuongoza katika hali ya amani na utulivu na si kuingia kwenye machafuko mara baada ya uchaguzi.

Alisema ili Chadema ishike dola, ni lazima wajitahidi kujenga safu ya uongozi wa kutawala na si kuwa na viongozi ambao kila wakati wanahamasisha watu kuandamana, kugoma na kuvizia makosa ya serikali iliyopo madarakani.

Alisema wanachokifanya Chadema ni sawa na wawindaji wanaokoka moto kwa ajili ya kuchoma nyama ili hali nyama yenyewe hawajaipata, na kwamba kazi ya kuing’oa CCM si rahisi kama inavyofikirika.

Hata hivyo alitoa changamoto kwa watawala na kusema, “CCM inapaswa kujipanga kwa kueleza ukweli juu ya mambo mbalimbali na

kupigana vita ya kweli dhidi ya ufisadi, rushwa na matumizi mabaya ya madaraka.”

Kisumo alisema wakati CCM ikielekea kwenye uchaguzi wa ndani ya chama, kimejipanga kikamilifu kupata watu safi wenye damu safi, ari mpya na nguvu mpya, ya kupambana na vyama vyote katika kushika dola

CHANZO: NIPASHE JUMAPILI