Uamuzi wa Monti waathiri masoko

Thamani ya hisa kwenye masoko barani Ulaya zilishuka jana kufuatia tangazo la waziri mkuu wa Italia Mario Monti, kwamba atajiuzulu wadhifa wake baada ya kutangazwa kwa bajeti ya mwaka 2013. Gharama za kukopa za serikali ya Italia zilipanda, na thamani kwenye soko la fedha la nchi hiyo zilishuka kwa asilimia tatu.

Tangazo la waziri mkuu Monti kujiuzulu lilikuja baada ya chama cha waziri mkuu wa zamani, Silvio Berlusconi kuacha kuiunga mkono serikali, na kuweka uwezekano wa uchaguzi wa mapema, ambao unaweza kufanyika kati ya Februari na Machi mwakani. Viongozi wa Ulaya wamezisifu juhudi za waziri mkuu Monti katika kujaribu kuurejesha uaminifu wa mfumo wa fedha wa Italia.