DC KASESELA AMPA MUDA WA MIEZI 6 MKURUGENZI MANISPAA YA IRINGA KUJENGA VYOO BORA SHULE ZA MSINGI 52

 Na MatukiodaimaBlog 
MKUU wa  wilaya ya  Iringa Richard Kasesela  ametoa muda  wa  miezi  sita  kwa mkurugenzi wa Halmashauri ya Manispaa ya  Iringa  kuhakikisha  shule zote  52 za Msingi  katika Manispaa ya  Iringa zinakuwa na  vyoo bora vinginevyo  shule  itakayobainika haina  choo  bora  itafungwa

Pamoja na kutoa agizo  hilo kwa  mkurugenzi wa Halmashauri ya  Manispaa  pia amewaagiza  watendaji wa  kata na mitaa kufanya msako maalum  wa  ukaguzi  wa  vyoo kwa wananchi  wote  na atakayekutwa hana  choo bora  apigwe faini ya Tsh 50,000.

Mkuu  huyo  wa  wilaya  amelazimika  kutoa agizo hilo  kufuatia kuwepo kwa taarifa  zinazoonyesha kati ya  watu watatu  katika Manispaa ya  Iringa mmoja kati yao  anadaiwa kutokuwa na uelewa wa matumizi bora ya choo kwa kuwa hawana uhakika wa kuitumia huduma hiyo ipasavyo.

Kasesela  alisema   kuwa  ili  kuwa na vyoo bora  ni  vizuri  zoezi la kuhakiki  vyoo  ikaanza  katika   shule  za msingi za   umma ambazo baaadhi  ya shule  hizo  zinakabiliwa na  changamoto  ya vyoo  bora hivyo lazima  kila mtendaji  kuwajibika  kuitisha  mikutano katika  eneo lake  kwa  ajili ya kuhamasisha wananchi  kuboresha  vyoo  hivyo  vya  shule  kabla ya  miezi 6 aliyotoa .

Akizungumza  juzi wakati wa kilele  cha  siku ya  choo Duniani iliyofanyika kiwilaya katika   viwanja vya shule ya Msingi Mtwivila  maadhimisho  yaliyoratibiwa na  asasi isiyo ya  kiserikali ya  ACRA-CCS ,Kasesela  alisema anatamani sana kuona  wananchi  wote  wanakuwa na  vyoo   bora  na wanaelimu sahihi ya matumizi ya choo.

Kasesela alisema takwimu zinaonesha kuwa matumizi ya choo bora hupunguza magonjwa ya kuhara kwa asilimia 32 na kunawa mikono kwa sabani hupunguza magonjwa hayo kwa asilimia 50 kuwa  sifa za choo bora kuwa ni kile kinachotunza faragha, chenye ubora, kisafi na kinachoongeza heshima kwa mmiliki wake.

" Suala   la  choo  bora  ni pamoja  na  watu  kujenga utamaduni wa  kunawa  mikono na natamani  sana kama nyumba  zote za ibada zikawa na vyombo  maalum  vya kunawa  mikono pindi  waumini  wake wanapoingia ibadani ....ila  pia shule zikiwa na vyombo vya wanafunzi  kunawa  mikono kama teknolojia ya chirizi ambayo  inatumia maji  kidogo  zaidi "

Akizungumza kwa niaba ya  ACRA-CCS, Afisa  habari ,Joseph Makanza alisema katika kata hgizo mradi wao unalenga kutambua mifumo ya usafi wa mazingira, kuimarisha mnyororo wa utoaji wa huduma za usafi wa mazingira, kusaidia kubadili tabia katika jamii na kuongeza upatikanaji wa huduma za usafi wa mazingira na maji. 

Makanza alisema huduma ya maji na usafi wa mazingira inahusisha matumizi ya teknolojia rahisi nay a bei nafuu kuujenga wa vyoo bora vitakavyomaliza tatizo la baadhi ya watu kujisaidia mahali popote pasipo na huduma hiyo.

Asasi hiyo inayofadhiliwa na Jumuiya ya Ulaya (EU) inaendesha mradi wa miaka mitano wa usafi wa mazingira na usambazaji wa huduma ya maji mjini katika kata nne za majaribio za Nduli, Kihesa, Mtwivilla na Mkimbizi zilizoko pembezoni mwa Manispaa hiyo.

MWISHO.