Wabunge wa upinzani Uganda wamuandikia barua Rais Museveni wakimtaka ajiuzulu

Baadhi ya wabunge wa kambi ya upinzani nchini Uganda wamemuandikia barua Rais Yoweri Museveni wa nchi hiyo wakimtaka ajiuzulu ndani ya siku 60 la sivyo wamtoe kupitia sheria za bunge.

Wabunge hao wakiongozwa na Ibrahim Ssemuju wa jimbo la Kyaddondo Mashariki na Odonga Otto wa jimbo la Aruu wamesema Rais Museveni ametenda makosa ya  jinai  mengi  zaidi za kiuchumi na hivyo hafai kuendelea kuongoza.

Wabunge hao wawili wamekabidhi barua hiyo kwa ofisi ya Rais kwa niaba ya wenzao, Ikulu ya Rais imepuuzia mbali barua hiyo na kuitaja kuwa upuuzi wa wabunge waliokosa kazi ya kufanya,

Sehemu moja ya barua hiyuo inasema "Bw. Rais, kutokana na umri wako mkubwa na kwa kuzingatia makosa ya jinai uliyowatendea wananchi wa Uganda, tunakutaka uchukue uamuzi wa kujiuzulu ndani ya miezi miwili ijayo la sivyo tutatumia sheria za bunge kukung'oa madarakani". Kambi ya upinzani imeshindwa kukusanya saini zinazotakikana kisheria ili kuwasilisha hoja ya kutokuwa na imani na rais katika bunge la nchi hiyo.