Wapinzani Misri wataka kura ya hapana kwa rasimu ya katiba

Muungano mkuu wa upinzani nchini Misri , wa  National Salvation Front, leo umetoa  wito  wa  kupiga  kura  ya "hapana" dhidi  ya  rasimu ya katiba  mpya  ya  nchi  hiyo kwenye upigaji wa kura ya maoni hapo Disemba 15.

 Pamoja na hapo mwanzo kukataa kushiriki kwenye kura hiyo, sasa muungano huo wa upinzani umetaka watu washiriki kwa kuikataa rasimu hiyo na pia umetaka upewe uhakika  juu  ya  uendeshaji  wa  kura  hiyo.

 Muungano huo  umedai  kuwa  kura  hiyo  ya  maoni  iliyopangwa kufanyika  Jumamosi  isimamiwe  na  majaji  kwa  jumla  na kuangaliwa   na  makundi  ya  ndani  na  nje  ya  asasi zisizokuwa  za  kiserikali. Wamedai  pia  vituo  vya  kupigia kura  pia   vinapaswa   kuwa  na  ulinzi  wa  kutosha.

 Hamdeen Sabahi  mjumbe  wa  ngazi  ya  juu  wa muungano  huo  ameonya  katika  mkutano  na  waandishi habari  kuwa  iwapo  uhakikisho  huu  hautatiliwa  maanani, muungano  huo  utajitoa  katika  kupiga  kura.

 Wakati  huo huo  juhudi  za  kutatua  mzozo  wa  kisiasa  nchini  Misri ambao  unazidi  kuwa  mbaya, zimepata  pigo leo wakati jeshi  lilipoahirisha ghafla mazungumzo yaliyokuwa yawakutanishe wapinzani na serikali, licha ya hapo kabla wapinzani kukubali kushiriki.