Qatar yataka wapinzani wa Assad wasaidiwe zaidi

Qatar  imesema  leo  kuwa  waasi  nchini  Syria wanaopambana  kuuangusha  utawala  wa  Rais Bashar al-Assad wako  ukingoni  mwa  ushindi  na  dunia  ina  wajibu wa kuwasaidia. Waziri  wa  mambo  ya  kigeni Sheikh bin Jassim al-Thani  ameuambia  mkutano  wa  "Marafiki  wa Syria"  nchini  Morocco  kuwa  utawala  wa  Rais  Assad umemalizika  baada  ya  miezi  20  ya  vuguvugu  la mapinduzi  ambalo yamewaleta  wapiganaji  wa  waasi karibu  na  mji  mkuu  Damascus.

Sheikh Hamad  amesema  kuwa  mkutano  unaofanyika mjini  Marrakech, una  umuhimu  wa  pekee, na  kwamba unafanyika  katika  wakati  ambao  watu  wa  Syria  wako karibu  na  kukamilisha  ushindi  wao  na  kufikia  matakwa yao  halali  ambapo wamepoteza  damu  yao  na  roho  zao. Waziri  wa  mambo  ya  kigeni  wa  Urusi Sergei Lavrov amesema  kuwa Marekani  kuutambua  upinzani  nchini Syria  ni  kukiuka  makubaliano.

Wakati  huo  huo  majeshi  ya  Syria  yanasemekana  kuwa yametumia  mabomu  ya  kuteketeza  katika  maeneo wanakoishi  watu  wengi. Shirika  la  kutetea  haki  za binadamu  la  Human Rights Watch , limetoa  wito  kwa maafisa  kuacha  kutumia  silaha ambazo  zinasababisha hususan madhara  makubwa  ya  kikatili  kwa  watu. Silaha hizo  mara  nyingi  husababisha  kuzuka  kwa  moto  na kuchoma  majengo  ama  kusababisha  watu  kuungua pamoja  na  matatizo  ya  kupumua.