Mazungumzo kati ya serikali na waasi yaahirishwa

Mazungumzo kati ya waasi wa M23 na Serikali ya Jamhuri ya Kidemokrasi ya Kongo yaliyokuwa yakitarajiwa kuendelea leo mjini Kampala, yameahirishwa huku msemaji wa tawi la kisiasa la M23, Betra Bisimwa, akisema pande zote mbili zinapumzika. 

Kilichoshuhudiwa hadi sasa kwenye vikao viwili vilivyopita ni pande zote kulaumiana mbele ya waandishi habari.

 Waziri   wa  mambo  ya  kigeni wa   jamhuri  ya  kidemokrasi  ya  Congo, Raymond Tshibanda, alisema hapo jana  wakati  wa  kuanza  tena mazungumzo  mjini  Kampala  kuwa  waasi  wa  M23 wamefanya  mashambulizi ya  kikatili  dhidi  ya  raia na ukatili  huo  umeonekana  na  maafisa  wa  Umoja  wa Mataifa. 

Kundi  la  M23  ambalo  liliundwa  mapema mwaka  huu  kutokana  na malalamiko  katika  jeshi  la nchi  hiyo, liliondoka  kutoka  mji  wa  Goma, mji  ambao waliukamata  kufuatia  mashambulizi  kadha  dhidi  ya jeshi  la  serikali  na  jeshi  la  umoja  wa  mataifa linalolinda  amani  katika   eneo  hilo.