HIVI NDIYO ILIVYOKUWA HUKO DUMILA

MAELFU ya abiria na mamia ya magari yakiwemo mabasi yanayosafirisha abiria kwenda kanda ya ziwa, yamekwama katika barabara kuu inayounganisha mikoa ya Dodoma na Morogoro, katika eneo la Dumila, wilayani Kilosa baada ya daraja kuu la Dumila kukatika kutokana na mvua kubwa ilionyesha wilayani Kilosa usiku wa kuamkia Januari leo.

Kuvunjika kwa daraja hilo kumesababishwa na  mafuriko makubwa na hivyo kusababisha nyumba  na watu kukosa makazi kutokana na mvua hiyo inayodaiwa kunyesha maeneo ya milimani wilayani Kilosa.

Mafuriko hayo pia yamesababisha kusombwa kwa nguzo za umeme, miti mikubwa  kukatika na kutanda barabarani huku shule ya sekondari ya wasichana Dakawa, chuo cha Veta Dakawa mahakama ya mwanzo Dakawa nazo kuathirika.

Watu wanadaiwa kufa maji huku wengine walionekana wakiwa juu ya miti kusubiri kuokolewa.

Kwa mujibu wa wenyeji wa eneo hilo mafuriko hayo yalianza majira ya saa 12 asubuhi  na kwamba mafuriko hayo hayajawahi kutokea kwa zaidi ya miaka 15 sasa ambapo mvua kama hiyo ilitokea 1995.

Mpaka sasa hakuna huduma zozote za kijamii, na bidhaa zilizopo eneo hilo, vitu kama chakula na maji, vimekuwa bei juu na kusababish adha kubwa kwa abiria hao.

Mkuu wa mkoa wa Morogoro Joel Bendera alifika eneo la Tukio kujionea hali halisi, na amewataka wananchi kuwa wavumilivu wakati serikali inafanya utaratibu wa kuwaokoa walioko juu ya miti na kutoa misaada kwa walioathirika zaidi.

Alisema kuwa kutokana na hali mbaya hiyo ya mafuriko serikali ya mkoa imelezimika kuomba helikopta kwa ajili ya kuokolea wananchi hao ambao wengine wamekwama katika mabati ya nyumba zao.

Mkuu wa Mkoa wa Morogoro, Joel Bendera akimsikiliza Meneja wa Tanroad Bi Doroth Mtennga

Wananchi wakiwa wamehifadhi mizigo juu ya mapaa ili kuiokoa na madhara ya mafuriko

Maelezo zaidi kutoka kwa Naibu Waziri wa Uchukuzi

Wananchi wakipeana msaada katika kujiokoa kutoka katika mkondo wa maji

Hii ni shule ya Msingi Magole, ikiwa imezungukwa na maji, hali inayomaanisha shughuli za elimi pia zimesimama

Wananchi kutoka katika kijiji cha Magole wakivuka kuelekea Morogoro

Shughuli ya kuvuka ikiendelea...

Kila mbinu ilitumika kuhakikisha kwamba mwisho wa siku kila mtu anavuka salama

Hawa walikwama juu ya paa