Watu 63 wauwawa katika shambulio la bomu

Mshambuliaji  wa kujitoa muhanga  amejipenyeza katika mazowezi  ya gwaride  katika mji  mkuu wa Yemen , Sanaa leo  na  kuuwa  watu  63  katika  shambulio baya kabisa dhidi ya mji huo  katika  miaka ya hivi karibuni ya nchi hiyo kutokuwa na hali ya usalama.

 Watu  kadha , wengi  wao wakiwa  wanajeshi, pia  wamejeruhiwa katika shambulio hilo, ambapo damu na sehemu za miili ya  watu  ilisambaa katika  eneo kubwa.

Waziri  wa  ulinzi  wa  Yemen  na mkuu  wa  jeshi  pia  walikuwapo  wakati  wa  tukio  hilo, la mazowezi  ya gwaride  kwa  ajili ya maadhimisho ya siku ya taifa hapo  kesho Jumanne,lakini hawakujeruhiwa.

 Maafisa wanatuhumu  kuwa  shambulio  hilo  limefanywa  na mwanajeshi ambaye  ni mkorofi. Mtu  mmoja  ambaye anadai  kuwa  anazungumza  kwa  niaba  ya  kundi  la wapiganaji  wa Ansar al-Sharia  amesema  kwa  njia  ya simu kuwa kundi  hilo linahusika na shambulio hilo.