JESHI LA POLISI LAFANYA UCHUNGUZI KUHUSIANA NA TUKIO LA KUKATIKA KIGANJA KWA MWANAMKE MMOJA HUKO MBAGALA

Jeshi la Polisi Kanda Maalum linafanya uchunguzi kuhusiana na tukio la kukatika kiganja cha mkono wa kulia cha mwanamke mmoja ajulikanaye kwa jina la MWANAHARUSI D/O HAMISI, Miaka 43, mama wa nyumbani, Mkazi wa Mbagala Rangitatu.

Awali, Polisi walipokea taarifa kuwa maeneo ya Mbagala Rangitatu Kibendera kijana mmoja CHARLES S/O HUSSEIN MADOE, Miaka 26, Mkazi wa Mbagala Kombora anayetuhumiwa kuiba pikipiki yenye namba za usajili T800 CTP aina ya Boxer rangi nyeusi, anataka kuuawa na wananchi wenye hasira baa ya kuingia kwenye nyumba ya mzee KALYA ili asiuawe.

Mara moja Polisi walifika eneo la tukio ili kumwokoa kijana huyo ambapo walikuta wananchi wakiwa wamezingira nyumba ya mzee huyo ambapo walitaka kuichoma moto ili mwizi huyo afie ndani endapo hawatamtoa nje. Polisi walifanya kazi ya ziada ili kumchomoa kijana huyo kwani wananchi walikuwa wanatupa mawe hovyo na jiwe mja lilimpata askari G.6129 D/C TWALIB na kumjeruhi begani.

Iliwalazimu askari kutumia mabomu ya machozi ili kuwatawanya wananchi na kujiokoa wao pamoja na mtuhumiwa na ndipo walipofanikiwa kuondoka eneo la tukio. Baada ya hapo zilipatikana taarifa kuwa katika nyumba ya jirani na eneo la tukio kuna mwanamke mmoja amekatwa kiganja cha mkono wa kulia na bomu.

Kufuatia taarifa hizo Jeshi la Polisi linafanya uchunguzi ili kubaini chanzo halisi cha tukio hilo na askari waliohusika katika tukio hilo wanahojiwa. Taarifa kamili itatolewa baada ya uchunguzi kukamilika. 

S. H. KOVA,

KAMISHNA WA POLISI KANDA MAALUM

DAR ES SALAAM