Tuesday, July 21, 2015

Kova: Tumewanasa walioua polisi Kituo cha Stakishari.

Kamanda wa Polisi Kanda Maalum ya Dar es Salaam, Suleiman Kova.
Jeshi la Polisi Kanda Maalum ya Dar es Salaam, limesema limewanasa watu wawili na kuua watatu wanaosadikiwa kuwa majambazi ambao walivamia kituo cha polisi cha Stakishari na kukamata bunduki 16 jijini Dar es Salaam.
Katika uvamizi wa kituo hicho, majambazi hayo yaliwaua Polisi wanne na raia watatu.
 
Akizungumza na waandishi wa habari jana jijini Dar es Salaam, Kamanda wa Polisi Kanda Maalum ya Dar es Salaam, Suleiman Kova, alisema, Polisi imewaua majambazi hayo wakati wakipambana.
 
Aidha, alisema jeshi hilo linawashikilia watu wawili wanaosadikiwa kuwa ni majambazi waliowakamata Julai 17, ikiwa ni siku chache baada ya kuvamia kituo cha polisi na kufanya mauaji hayo.
 
Kamanda Kova aliwaeleza waandishi wa habari kuwa kabla ya kuwakamata majambazi hayo, kulikuwa ni mapambano makali ya kurushiana risasi.
 
Alisema msako wa kuwasaka majambazi hayo, ulianza baada ya tukio hilo kutokea na kwamba tayari wamekamata Bunduki 16 zilizokuwa zimeporwa na majambazi hayo.
 
“Julai 17 zilipatikana taarifa za kuaminika kwamba maeneo ya Toangoma Mbagala, kulikuwa na majambazi waliohusika kwenye tukio la Sitakishari wakijiandaa kufanya tukio la uhalifu,” alisema na kuongeza:
“Baada ya taarifa hizo kikosi maalum kilienda eneo la tukio na kuweka mtego ili kuwanasa washukiwa.”
 
“Watu  watano waliokuwa wamepakizana katika pikipiki mbili  walisimamishwa na Polisi walikaidi kusimama na hapo ndipo  mapambano makali ya kurushiana risasi na polisi yalipoanza ambapo watuhumiwa watano walikamatwa, watatu kati yao walikuwa wamejeruhiwa vibaya na hivyo walifariki dunia wakiwa njiani kukimbizwa hospitali na watuhumiwa wawili walikamatwa na wanashikiriwa na polisi kwa mahojiano.”
 
Kova alisema Julai 19 zilipatikana habari za kuaminika kutoka kwa wasamaria wema kwamba silaha zilizoporwa kwenye kituo cha Sitakishari zimefichwa Mkoa wa Pwani katika sehemu isiyofahamika vizuri. Aliongeza kuwa vikosi mbalimbali vya Polisi vilikwenda mkoani humo na kufanya msako mkoani Pwani katika kijiji cha Mandimkongo kata ya Bupu Wilaya ya Mkuranga katikati ya msitu.
 
Baada ya taarifa za kuaminika kikosi maalumu kilifukua ardhini na katika shimo hilo zilipatikana bunduki 15 na kati ya hizo, saba ni aina ya SMG na SAR  pamoja na risasi 28. Alifafanua kuwa silaha zote zilitambuliwa kuwa zilikuwa za kituo cha  Sitakishari.
 
Alisema katika shimo hilo lillilofukuliwa ili patikana silaha moja aina ya Norinko ambayo inafanyiwa uchunguzi pia katika shimo hilo zilipatikana fedha Sh. 170,000,000 ambazo zilikuwa zimefugwa katika sanduku maalumu.
 
Watuhumiwa wa ujambazi waliouawa ni Abbas Hashimu Mkazi wa Mbagala, Yasni na Saidi wakazi wa Kitunda Kivule na wanaoshikiliwa na Polisi ni Ramadhani Hamisi (15), mkazi wa Mkuranga na Omari Amour (24) mkazi wa Mbagala.
CHANZO: NIPASHE

Gwajima asomewa mashitaka ya kumtukana Askofu Pengo.

NA HELLEN MWANGO

Askofu wa Kanisa la Ufufuo na Uzima, Josephat Gwajima.
Askofu wa Kanisa la Ufufuo na Uzima, Josephat Gwajima, jana alikana kutoa lugha ya matusi dhidi ya  Askofu Mkuu wa Kanisa Katoliki Jimbo Kuu la Dar es Salaam, Mwadhama Polycarp Kardinali Pengo, kwamba mtoto, hana akili na mpuuzi.
 
Askofu Gwajima alikanusha tuhuma hizo wakati akisomewa maelezo ya awali mbele ya Hakimu Mkazi wa Wilfred Dyansobera anayesikiliza kesi hiyo katika Mahakama ya Hakimu Mkazi Kisutu, jijini Dar es Salaam.
 
Wakili wa Serikali Mwandamizi, Joseph Maugo, alidai kuwa kati ya Machi 16 na 25, mwaka huu katika viwanja vya Tanganyika Packers, vilivyopo Kawe jijini Dar es Salaam, mshtakiwa alitoa lugha ya matusi kwamba ‘mimi Askofu Gwajima nasema askofu Pengo ni mpuuzi mmoja yule, mjinga mmoja, amekula nini yule, sijui amekula nini yule mtoto hana akili yule’ alinukuu maneno hayo.
 
Alidai kuwa Askofu Gwajima alitoa maneno hayo yakufadhaisha dhidi ya Askofu Pengo na kwamba yanaweza kusababisha uvunjifu wa amani.
 
Upande huo wa Jamhuri ulidai kuwa Machi 27, mwaka huu mshtakiwa alifikishwa Kituo cha Polisi Kanda Maalum ya Dar es Salaam kwa ajili ya kuhojiwa.
 
Ilidaiwa kuwa alifunguliwa mashitaka na kufikishwa mahakamani dhidi ya tuhuma hizo.
 
Hata hivyo, Askofu Gwajima alikana mashitaka hayo lakini alikiri majina yake, wadhifa wake, kuhojiwa Kituo cha Polisi Kanda Maalum ya Dar es Salaam, kweli kanisa lake liko Kawe na kushitakiwa mahakamani hapo.
 
Upande wa Jamhuri ulidai kuwa unatarajia kuita mashahidi saba na watawasilisha vielelezo vitano.
 
Wakati huo huo, mahakama hiyo imepiga kalenda kusoma maelezo ya awali ya kesi inayomkabili askofu huyo na wenzake watatu, baada ya mshtakiwa wa nne kuwa mgonjwa.
 
Kesi hiyo itasikilizwa mbele ya Hakimu Dyansobela Agosti 10, mwaka huu.
 
Mbali na Gwajima wengine ni  anayedaiwa kuwa mlinzi wake George Mzava,Yekonia Bihagaze  na Georgey Milulu. 
 
Katika kesi ya msingi, washtakiwa wote kwa pamoja wanadaiwa kuwa Machi 29, 2015 katika Hospitali ya TMJ iliyopo Mikocheni A, jijini Dar es Salaam,washtakiwa kwa pamoja walikutwa wakimiliki bastola aina ya Berretta yenye namba ya siri CAT 5802 bila ya kuwa na kibali toka kwa mamlaka inayohusika na silaha  na milipuko.
 
Alidai kuwa  washtakiwa hao walifanya kosa hilo kinyume na kifungu cha 32 (1) na cha 34 (1)(2) na(3) cha sheria ya Silaha na Milipuko sura ya 223 iliyofanyiwa marekebisho mwaka 2010.
 
Upande wa Jamhuri, uliendelea kudai kuwa siku hiyo ya tukio Mzava akiwa na wenzake hao walikutwa wakimiliki isivyo halali risasi tatu za bastola pamoja na risasi 17 za bunduki aina ya Shotgun. Washtakiwa walikana mashitaka yao kwa nyakati tofauti na wako nje kwa dhamana.
CHANZO: NIPASHE

BVR 8,000 kuandikisha D'Salaam.



Mkuu wa Mkoa wa Dar es Salaam, Saidi Meck Sadiki.
Uandikishaji katika Daftari la Kudumu la Wapigakura kwa teknolojia ya Biometric Voters Registration (BVR), jijini Dar es Salaam, unaanza kesho huku takriban mashine 8,000 zikitarajiwa kutumika kwa kazi hiyo.
 
Aidha, Mkuu wa Mkoa wa Dar es Salaam, Saidi Meck Sadiki, ametoa onyo kali kwa maofisa waandikishaji watakaochelewa kufika na kuondoka kabla ya muda katika vituo vya uandikishaji.
 
Sadiki ambaye alikuwa akizungumza na waandishi wa habari ofisini kwake jana, alisema uandikishwaji jijini humu utaanza kesho na kuhitimishwa Julai 31, mwaka huu.
 
Alisema takribani wakazi milioni mbili wanatarajiwa kuandikishwa katika BVR na kwa wakazi wenye sifa takribani milioni mbili wa Jiji la Dar es Salaam.
 
Kwa mujibu wa Sadiki, vituo 1,684 vitatumika katika uandikishaji kwa Manispaa za Ilala (396), Temeke (572) na Kinondoni (706).
 
Alisema Manispaa ya Kinondoni itakuwa na maofisa uandikishaji 1,412 na wa akiba 136, waandishi wasaidizi 706 na wa akiba 136.
 
Aidha, alisema Manispaa ya Temeke nayo itakuwa na maofisa uandikishaji 1,144, wa akiba 128, waandishi wasaidizi 572 na wa akiba 128.
 
Alisema Ilala itakuwa na maofisa uandikishaji 792 na wa akiba 144, waandishi wasaidizi 136 na wa akiba 144.
 
Kwa mujibu wa Sadiki, katika manispaa hizo pia kutakuwapo na ofisa mwandikishaji wa halmashauri, ofisa uchaguzi, maofisa wasaidizi wa majimbo na kata na wataalam wa Tehama.
 
Sadiki alitoa wito kwa wakazi wa Jiji la Dar es Salaam kujitokeza kwa wingi na mapema kujiandikisha kwani kinyume chake watapoteza haki yao ya kupiga kura.
 
Alisisitiza kuwa wasio raia wa Tanzania hawaruhusiwi katika uandikishwaji huo na atakayebainika atachukuliwa hatua za kisheria.
 
Aliwataka maofisa uandikishaji kufika vituoni kwa wakati na kuondoka kwa muda uliowekwa na  Tume ya Taifa ya Uchaguzi (Nec) ili kuwaondolea usumbufu wananchi.
 
Sadik alisema maandalizi yakiwamo mafunzo kwa wahudumu, yalishafanyika kwa manispaa zote.
 
Akizungumza na NIPASHE juzi, Mwenyekiti wa Nec, Jaji mstaafu Damian Lubuva, alisema vituo vutafunguliwa saa 2:00 asubuhi na kufungwa saa 12:00 jioni kila siku.
 
Kwa mujibu wa Jaji Lubuva, kila kituo katika manispaa hizo, kitakuwa na mashine za BVR mbili kwani mashine 8,000 zilizokuwa zikitumika mikoa mingine zinatarajia kuletwa jijini Dar es Salaam na hivyo kuwaondolea hofu ya kukosa kujiandikisha kwa wakazi wake.
 
Kwa  mujibu wa Sensa ya Watu na Makazi ya mwaka 2012, wananchi wenye sifa ya kupiga kura katika Uchaguzi Mkuu Oktoba, mwaka huu ni 24, 252, 927.
 
Watu wenye sifa ya kupiga kura katika Jiji la Dar es Salaam ni 2,932,930 kati ya watu 4, 713, 213. 
Awali, uandikishaji kwa mfumo wa BVR, jijini Dar es Salaam, ulipangwa kuanza Julai  12, mwaka huu, lakini uliahirishwa kwa ajili ya maandalizi zaidi.
CHANZO: NIPASHE

Milio ya risasi yatanda uchaguzi wa Burundi

Miripuko  na  milio  ya  risasi  ilisikika  katika  mji  mkuu  wa Burundi, Bujumbura, usiku  wa  jana   ambapo  watu wawili  wanaripotiwa  kuuwawa masaa  machache  kabla ya  vituo  vya  kupigia  kura  kufunguliwa katika  uchaguzi unaofanyika  leo.
Hali  ya  ukosefu  wa  utulivu  inakuja  kutokana  na wasiwasi  kuhusiana  na  juhudi  zenye  utata  za  Rais Pierre Nkurunziza  kutaka  kuchaguliwa  tena  kwa  kipindi cha  tatu, ambapo  waandamanaji  wamesema  nia  yake hiyo  inakiuka  katiba, ambayo  inaruhusu  ukomo  wa vipindi  viwili.
Vituo  vya  kupigia  kura  vimefunguliwa  leo  asubuhi kwa ajili  ya  uchaguzi  huo  ambao  unasusiwa  na  vyama vikuu  vya  upinzani  na  kutishia  kuitumbukiza  nchi  hiyo ya  Afrika  Mashariki  katika  ghasia  kubwa. Zaidi  ya  raia 160,000 wa  Burundi  wamekimbilia  nchi jirani, wengi wakisema  wanahofia  mashambulizi  ya vijana  wa  chama tawala  wanaojulikana  kama  Imbonerakure

Kenya kumkaribisha Obama katika bara linalohisi kubaguliwa


Wakati Rais wa Marekani atakapokuwa ziarani barani Afrika, atapokewa na bara lililotarajia kuwa na mahusiano ya karibu na mtu waliyedai ni kijana wa nyumbani, katika kijiji alikozikwa baba wa rais wa 44 wa Marekani.
Rais wa Marekani Barrack Obama
Rais wa Marekani Barrack Obama
"Tulidhani serikali ya Marekani angalau italeta usaidizi katika eneo hili," alisema Stephen Okumu Obewa, mwalimu katika shule ya msingi ya Senator Barack Obama mjini Kogelo. Shule hiyo ilipewa jina hilo hata kabla ya rais Barrack Obama kuingia ikulu. "Labda bado ana nia hiyo lakini sisi hatujui," alisema Okumu alipokuwa katika shule hiyo ambapo madawati na viti vingi vilikuwa vimevunjika.
Obama aliwahi kuandika juu ya ziara yake kijijini Kogelo katika kitabu chake mwaka 1995 kilichopewa jina "Dreams from My Father", yaani "Ndoto kutoka kwa Baba yangu" kilichomsaidia kuanzisha safari yake ya kisiasa.
Kijiji hicho pole pole kikaanza kupata umaarufu, watalii wakaanza kukitembelea huku wageni wa kila aina wakionekana kubisha hodi mlangoni mwa bibi yake wa kambo, Mama Sarah.
Bibi yake Barrack Obama, Mama Sarah
Bibi yake Barrack Obama, Mama Sarah
Karibu sana na kijiji hicho, kuna kaburi la baba yake Barack Obama mwenyewe, mwanauchumi katika serikali ya Kenya aliyefariki kutokana na ajali ya barabarani mwaka wa 1982, ikiwa ni miaka 21 baada ya rais kuzaliwa wakati alipokuwa akiishi Hawaii kama mwanafunzi.
Hata hivyo, Wakenya wengi wanashangaa ni kwa nini Rais Obama hajatoa kipaumbele katika maendeleo ya bara la Afrika kwa mihula miwili ya uongozi wake.
"Wakati alipochaguliwa kulikuwa na hamu kubwa na matumaini kuwa mahusiano ya Marekani na bara la Afrika yataimarika kwa kiwango kikubwa na kwamba Marekani itaelekeza nguvu zake katika bara hilo, lakini rekodi ya mambo hayo ni ndogo mno," alisema David Zounmenou, mtafiti katika taasisi moja ya masuala ya Usalama nchini Afrika Kusini.
Obama asema anatoa kipaumbele kwa eneo zima na sio tu Kenya
Rais Barrack Obama
Rais Barrack Obama
Obama ataitembelea Kenya na Ethiopia mwezi Julai ikiwa ni ziara yake ya tatu kubwa katika eneo hilo la jangwa la Sahara, baada ya kusafiri Ghana mwaka wa 2009 na nchini Tanzania, Senegal, na Afrika Kusini mwaka wa 2011. Obama pia aliwahi kuitembelea Misri, na Afrika Kusini wakati wa maziko ya moja ya shujaa wa Afrika Marehemu Nelson Mandela.
"Matumaini yangu ni kutoa ujumbe kuwa Marekani sio tu mshirika mkubwa nchini Kenya bali kwa eneo zima la Jangwa la Afrika," alisema Obama wiki iliyopita. Aliongeza kuwa anatumai kujenga maendeleo katika masuala ya afya, elimu, kukabiliana na Ugaidi na kuhimiza demokrasia na kupunguza rushwa.
Kwa upande wao maafisa wa Marekani wamesema muonekano wa kuwa Rais Obama amelitelekeza bara la Afrika sio jambo zuri la kusemwa, wakitiliana maanani juhudi za marekani za kukabiliana na ugonjwa hatari wa Ebola, katika mataifa ya Afrika Magharibi na mpango uliozinduliwa mwaka wa 2013 wa dola bilioni 7 wa kusambaza umeme barani Afrika.
Wakaazi mjini Kogelo alikozaliwa babake rais Obama
Wakaazi mjini Kogelo alikozaliwa babake rais Obama
Lakini huku hayo yakiarifiwa balozi wa Marekani Robert Godec amesema rais Obama hatokitembelea kijiji cha Kogelo, na kuwa badala yake atawahutubia watu wa Kenya katika uwanja wa Nairobi mnamo Julai 26.
Lakini licha ya hayo wakaazi wa Kogelo bado wanajitayarisha kumpokea kijana wao iwapo ataamua kuwatembelea. Wakaazi wa eneo hilo bado wako katika harakati pia za kusafisha kaburi la babake rais huyo wa Marekani.
"Milango yako wazi usiku na mchana kwa rais Obama," alisema Mashart Onyango, anayeishi katika boma la familia ya Obama aliyesema ni mmoja wa shangazi zake baba yake Obama.
Muandishi: Amina Abubakar/Reuters