JESHI LAPOLISI KUIMARISHA ULINZI WAKATI WA MECHI YA REAL MADRID NA TANZANIA 11 ITAKAYOFANYIKA TAREHE 23/08/2014 KATIKA UWANJA WA TAIFA.

            Jeshi la Polisi Kanda Maalum Dar es Salaam kwa kushirikiana na vyombo vingine vya ulinzi na usalama tumejipanga ipasavyo kuhakikisha mchezo kati ya REAL MADRID ya nchini Hispania na TANZANIA 11 ya Tanzania wenye mvuto mkubwa kwa mashabiki wa Tanzania, nchi za Afrika Mashariki, Afrika na duniani kote utachezwa katika hali ya usalama.

Mechi hiyo inawahusisha wachezaji wa Klabu ya Real Madrid ambao wanafahamika katika nchi zao na kote duniani kwa vile wameshiriki  michezo ya kimataifa ya mpira wa miguu ambao wamepata umaarufu mkubwa. Kwa kufahamu hilo maandalizi mbalimbali ya kiusalama yamekwishafanyika ili kuhakikisha wachezaji hao na maafisa walioambatana nao wanakuwa salama kuanzia siku ya kwanza hadi watakapoondoka. Pia umeandaliwa utaratibu wa kuhakikisha usalama katika uwanja wa taifa kabla, wakati na baada ya mechi hiyo.

Kutakuwa na idadi kubwa ya askari polisi walioandaliwa mahususi kwa ajili ya mechi hiyo ya kirafiki ya kimataifa wakishirikiana na vyombo vingine vya dola vilivyopewa majukumu maalum ya kulinda usalama katika uwanja huo. Kila atakayeingia uwanjani atathibitishwa kwamba ni mtu sahihi asiye na silaha au chochote chenye kuleta madhara.

Katika uwanja huo hakuna mtu atakayeruhusiwa kukaa katikati ya ngazi za kupandia au kushukia ikiwa ni hatua ya kudhibiti usalama. Ni marufuku kuingia uwanjani na chupa ya maji au kimiminika chochote na endapo mtu atahitaji huduma hiyo, kutakuwa na utaratibu maalum ulioandaliwa.

Safari hii tunategemea walinzi maalum wa mpira (STEWART) kuongeza nguvu ya ulinzi wa kawaida na watakuwa wanaangalia upande wa watazamaji (Jukwaani). Hivyo mtu yeyote atakayekiuka taratibu au kusababisha hofu katika uwanja huo ataonekana na atachukuliwa hatua kali za kisheria bila kujali nafasi yake katika jamii. Aidha, flash- flash au aina yeyote ya milipuko iwe na sauti au la hairuhusiwa kutumika uwanjani hapo siku ya mchezo huo muhimu.

Aidha, mafanikio katika mechi hiyo hayataishia katika mambo ya kiusalama pekee bali pia kiuchumi hasa katika sekta ya utalii.

S. H. KOVA

KAMISHNA WA POLISI KANDA MAALUM

DAR ES SALAAM